Chro.Lit kontan prezante w powèm sa, kote lanmou, politik, relijyon, ak piman melanje nan menm govi a. Mèt Vèb se modèl Powèt « yon dous yon cho », ki pote yon pawòl boule, pafwa dous kou siwo dòja. 

Pwezi sa a se yon dife k ap bat nan vant Ginen. Li l !

Se ou menm ki mete m nan sa

Nan jwèt oslè anba bab bayawonn
kako w pandye
tankou solèy
k ap leve aprè move tan
 
nan  jwèt marèl
nan lakou Janpipre
m rive nan syèl ou
tankou van
k ap pote vwalye m
 
chak kout pagay
ou bay bwafouye m
mete m pi pre resif
kote krab akokiye
nan pye zetwal
 
se ou menm ki mete m
 
nan konte sik nan kafe
yo fè ak te kilòt ou
se ou ki moutre m
chimen limyè
se kalòt prezidan
pran nan fèt laprimati
 
 
Mwen wè foumi pote
tout  kò m
nan on lavalas gouyad
kote moso katon karès
fè dapiyanp sou lespwa
 
 
Ou te di m
se nan kondisyon
kòk bat
renmen gangan
se renmen chwal li
 
Se ou menm ki mete m
 
M pa fouti fèmen je m
lè se pa ou k ap chofe m
si m te pi womantik
m t ap di w
koupe branch zetwal
pou lalin mwen chita
 
m fè devosyon sou pay mayi
lè w fin mouye kabann mwen
ak akòdeyon bann ou
mete piman nan poban m
 
Se ou menm k ap konte  
 
kantite piman y ap sifoke
nan kalson
ban m piman
jouk lwa m touye channmas
 
 
sa fè lontan m chita nan vil la
Lakansyèl mwen fin bwè dlo
Se egoyis ki pa kite mak
Kote l met pye l
Ou menm ou la
Maten
Midi
Aswè
W ap mounou-mounou
 
ban m piman
mete piman anwo revandikasyon
pwèl mwen pot bay Leta
piman bouk
soufle piman nan venn
jouk li toufe PHTK
 
 
se ou menm ki plonje m
 
ou te di m
sou presyon grangou
m pote lespwa marinad
w ap la jouk zandolit
kanni sou fetay malere
 
Men m te replike
nan fènwa fouk pantalon w
m wè klè kou dlo kòk
rès piman simityè
pòtoprens
 
se ou menm k ap pote m
 
 
Anba pye siwèl la
n ap fè lapli tonbe
jouk tout moun kotfè
kite bouk la
 
Kotfè s on vil dous
men pa douvan pwent tete w
lè siwo sou tèt koulèv
se pòtoprens ki manje kasav
 
Sonje m te di w
powèm nan s on moso twal
k ap baloye
nan pandri Leta
lè moun solino desann nan Kafou
 
 
Se pou ou
m ekri anba vant fatra
k ap defile Taba
nan kwen je Okap
chak fraz
pote moso priyè
tout vil la anba zèsèl mwen
k on je m klè
se ou ki vil la
 
epi g on moun fou ki pran chante
 
Se ou menm ki mete m
se ou menm ki mete m
ou menm ki mete nan sa
mete m nan sa
nan sa
mete m
 
Machè
ban m piman m
 
 

Otè : Guillol VICIÈRE « Mèt Vèb »

L’article Se ou menm ki mete m nan sa est apparu en premier sur Radio Télé Masseillan Info.

M FAYA POU OU

Depi kò nou te fin kwaze nan ri Louvèti a cheri, souf ou s on ti moso nan mwen chak fwa m rayi kò m, m renmen w pi plis. 

Tout souvni fè blad nan lespri m, yo jwe ak kò yo, yo jwe ak malè tou.  Tout bonè m tounen sann, lè m aprann ou menm ak nanm ou se de fanm ki pa fè menm rèv cheri, ki pa gen menm laj. Se te yon jou kou jodi a, m t ap bay limanite manti, m t ap aprann teke mab nan wonn ou, m t ap aprann mezire fòs vil la nan de plamen m Menm moman sa, leta te pase pran w nan men m. Tout bo nou te bo te tounen blad

Kounya m konprann poukisa lè w ap renmen m se ak tete goch ou, ou renmen m. 

M konn mak pye w ka bay moun li vle manti cheri

M mòde remò m pou tan an pa ekri powèm sou laj mwen

Ou s on fi landrèt ou pou bondje lanvè w pou twouble memwa

Tan an Kanaval se fason kò w bay tout gason Ochan

Pa kite m pann tèt mwen nan lèt sa cheri

M poko janm wè kouman lanmou dezabiye lè kò w ap bay tèt ou manti

M aprann poukisa lè w souri  ou bay tout ri ou pile manti…ou menm ak Kanaval se de fanm ki pa pote menm jipon 

Nou pa mache menmjan

Tan an vin twouble inosans ou, tout souvni nou tounen zensèl dife

Inosans mwen p ap twonpe m lè w ap soti nan ou

Tout pousyè nou pile fade vizaj vil la

Depi lè, remò touye tout jou. 

M pa konn si w ap vini ankò cheri, men si w ap vini, pa vin ak kò w sèlman

Bat pou tout sa k ap soti anndan w ka pwolonje souf nou menm longè

Ou se yon fanm ki abite nan de kò 

Youn pou mwen lòt la pou twouble memwa tan an. Ou menm ak kanaval se de fanm ki twonpe laj mwen lè nou vle. 

Vini anvan kò m avili m. 

 FEGUERSON THERMIDOR

L’article CHRO.LIT #03 | M FAYA POU OU  est apparu en premier sur Radio Télé Masseillan Info.