Ki danje ak avantaj rezo sosyal yo sou vi pèsonèl nou? 

Jounen jodi a, li prèske enposib pou imajine lavi san rezo sosyal. Facebook, Instagram, TikTok, WhatsApp ak lòt yo tounen yon pati enpòtan nan fason nou kominike, enfòme ak amize nou. Men, èske yo vrèman bon pou nou? Rezo sosyal yo pote anpil avantaj, men yo gen danje tou ki ka afekte lavi pèsonèl nou san nou pa rann nou kont.

An n gade ansanm avantaj yo : 

1. Kominikasyon pi fasil

Rezo sosyal yo fè nou kapab rete an kontak ak fanmi ak zanmi, kèlkeswa kote yo ye nan mond lan. Yon mesaj sou WhatsApp, yon apèl videyo sou Messenger. Nou gen kòm enpresyon distans la pa menm egziste ankò.

2. Aksè ak enfòmasyon

Nou ka aprann anpil bagay sou rezo sosyal yo. Yon moun ka suiv nouvèl, aprann nouvo konpetans, jwenn konsèy sou lavi chak jou oswa menm aprann yon metye.

3. Opòtinite ekonomik

Anpil moun jodi a ap fè lajan ak rezo sosyal yo. Gen moun k ap vann pwodwi, k ap fè maketing, oswa k ap travay kòm enfliyansè. Si yon moun konnen ki jan pou li itilize yo byen, li ka chanje lavi li.

4. Amizman ak relasyon sosyal

Videyo TikTok, blag sou Facebook, mizik sou YouTube… rezo sosyal yo bay anpil fason pou nou detann nou. Anplis, yo ka ede nou rankontre nouvo moun epi devlope rezo relasyon nou.

An n wè danje yo kounya : 

1. Pèt tan ak depandans

Gen moun ki pa ka pase senk minit san yo pa tcheke telefòn yo. Rezo sosyal yo ka tounen yon depandans ki fè nou pèdi tan nou san nou pa menm rann nou kont.

2. Enpak sou sante mantal

Twòp rezo sosyal ka lakòz estrès, depresyon ak santi ou pa ase bon. Lè w ap wè lòt moun ap afiche bèl foto ak bèl lavi, ou ka santi lavi pa w pa vo anyen, pandan w pa konnen si sa yo montre a se verite.

3. Pwoblèm vi prive

Yon fwa ou mete enfòmasyon ou sou rezo sosyal, ou pa gen kontwòl sou li ankò. Gen moun ki pèdi travay yo paske yo te afiche bagay ki pa t dwe piblik. Lòt ka viktim vòl idantite oswa moun k ap eseye manipile yo.

4. Move enfòmasyon ak manipilasyon

Rezo sosyal plen ak fo nouvèl. Gen moun ki kreye manti pou enfliyanse panse lòt moun, espesyalman sou politik, sante ak afè sosyal. Si ou pa reflechi sou sa w li, ou ka fasilman tonbe nan pyèj la.

Aprè nou fin prezante w divès avantaj ak dezavantaj rezo sosyal yo sou lavi nou, li enpòtan pou n gade nan ki nivo posib nou kapab limite dega yo. 

Kisa w dwe fè ? 

Dabò, fè atansyon ak sa w ap pataje : Pa mete twòp enfòmasyon pèsonèl sou rezo sosyal. Answit, kontwole tan w ap  pase sou yo: Mete limit pou w pa gaspiye tout jounen w ap panse ak rezo yo. Li enpòtan pou w verifye enfòmasyon avan w kwè yo: Pa kouri pataje nouvèl san w pa fin sèten li vrè.

Ou dwe tou konprann rezo sosyal se yon ilizyon: Pifò moun afiche sa ki bèl sèlman, pa konpare lavi w ak sa w wè sou ekran an.

Boutofen, kòm ou ka wè l, rezo sosyal yo gen avantaj yo, men yo gen dezavantaj yo tou. Depi w aprann itilize yo ak entèlijans epi ak mwayen pou pwoteje tèt ou, ou ka benefisye de yo san ou pa tonbe nan move konsekans yo. Kesyon an se : Èske ou kontwole rezo sosyal yo, oswa se yo k ap kontwole w ?

Radio Télé Masseillan Info (RTMI)