Lapolis, nan ki kan w kanpe ?

Jounen mèkredi 19 mas la, Lapolis, olye l taye banda sou teworis ki kontinye ap defye otorite Leta a, te pito louvri kout zam sou manifestan ki t ap egzèse dwa lejitim yo pou mande sekirite. Manifestan sa yo ki te deside brave danje pou al mande nèf prezidan « se pete » padon, KPT (Konsèy prezidansyèl tranzisyon) yo kote sekirite yo te pwomèt la, pa t resevwa repons ak mo, men ak gaz lakrimojèn epi bal reyèl. 3 manifestan soti blese, youn ladan yo mouri lopital. 

Lapolis, nan ki kan w kanpe ? Se yon kesyon ki sanble senp, men ki fè sans pou mwen. Peyi a, sitou kapital Pòtoprens ki tounen yon laboratwa laterè kote teworis nan « Viv Ansanm » ap fè popilasyon an monte lesyèl pa do. Tout moun viktim, san eksepsyon. Popilasyon an ap sibi, Lapolis la, menm jan ak nou, ap konte kadav. Fanmi polisye yo pa epanye. Yo tonbe anba bal menm jan ak rès sosyete a. Kay yo boule, madanm ak pitit yo oblije abandone tout sa yo te bati.

M pa sispann mande tèt mwen, m t ap renmen nou youn reponn mwen, poukisa nou blije tire bal sou yon gwoup moun menm jan ak nou k ap revandike sa ki konsène nou tout ? 

Anpasan, ki fòs ki reyèlman montre li kapab mete kriminèl yo sou defansiv ? Se pa Lapolis, se pa fòs etranje yo… men pito pèp la ak mouvman « Bwa Kale » a. Mouvman sa a, malgre tout kontradiksyon li, se sèl bagay ki fè teworis yo pè. Lapolis, li menm, li toujou pi efikas lè pèp la kanpe bò kote l. Se pa pou san rezon enstitisyon an, dènye moman yo, ankouraje maryaj Polis-Popilasyon an. 

Men, koulye a, si Lapolis ap tire sou pèp la menm jan teworis « Viv Ansanm » yo ap tire sou li, nou dwe poze tèt nou kesyon.

Lapolis, nan ki kan w kanpe ? 

Kijan nou vle pou pèp la wè nou lè n ap wete lavi frè, sè yo nan yon kontèks kote peyi a ap efondre devan je nou pandan ni dirijan, ni fòs lòd ki gen responsabilite pou aji sou pwoblèm yo fè bèk atè.

Moman an rive pou n fè yon chwa, swa n se sòlda pèp la oswa yon lòt branch nan gwoupman teworis « Viv Ansanm » lan ki gen inifòm ?

Nan ki kan w kanpe, Polis ? 

Otè : Wilsonley SIMON